.

الجنة بدُعا المساكين

Foto


الجنة بدُعا المساكين

 

 

أحلف بكل قسم ويمين
وبكل أيمانات المسلمين
وبكل مِلّة وكل دين
إن احنا لو كُنَّا مؤمنين
ما كان حَد مِنَّا بات حزين
بحق كل نَدهِة أدان
وركعة وسجدة لكل أوان
وليالى خَتم القرآن
بحق أجراس وترانيم
وقداس يملا الودان
إن احنا لو كنا مؤمنين
ما ناموا ولاد حارتنا جعانين
ويشهد علينا الصوم
وتهجد يحَرَّم علينا النوم
وزكاتنا اللى لَجْل صورتنا
حرَمْناها على المحروم
ولقمَة فى بطونا ما بتدوم
إن احنا لو كنا مؤمنين
ما ماتوا بقلِّة الدوا العيانين
والله رب العالمين
اللى خلقنا متساويين
ومش ح نبقى طيبين
ولا ح نبقى مؤمنين
طول ما ايدينا فى بُقِّنا
وسايبه بُق الجعانين
وسايبه اللى يجوع
واللى يضيع
واللى دمعه يُخنق فى جوفه الأنين
طول ما احنا قفلين البيبان نايمين
سَدِّين الودان مش سامعين
العبادة مش هىَّ بس الدين
الدين حياة نعيشها بنى آدمين
إحساس يجمعنا فى سبحة
تسبح رب العالمين
واهب نعمَه لكل البشر
ما اختص بيها أُمرَا ولا سلاطين
ولا جعل الجنة للخِزَن والملايين
افهم يا ابن آدم
كلنا من آدم
كلنا من طين
والسَجدة تقربنا من ربنا
لكن الجنة
مفروشة بدُعا المساكين
بكفوف تمسح دمع العين

 

يا ساده هذه ليست أحاديث نبوية

تحفيزات